Photo

ရန်ကုန်ပြန်လာပြီး သီချင်းသစ်တစ်ပုဒ် ထပ်မံစီစဉ်နေတဲ့ မေရီ

By 7Day News 10 August, 2017 - 21:06

ဂျပန်နိုင်ငံတွင် နေထိုင် သည့် Mary က တတိယသီချင်း တစ်ပုဒ်ကို ဖန်တီးရန် မြန်မာနိုင်ငံသို့ ပြန်လာခြင်းဖြစ်ကြောင်း ပြောသည်။


ဝဲ၊ Mask စသည့်သီချင်းနှစ်ပုဒ်ဖြင့် ပရိသတ်အားပေးမှု ရရှိထားသော Mary သည် ဩဂုတ်လ ကျောင်းပိတ်ရက်တွင်  ဇာတိမြေ ရန်ကုန်သို့ တစ်လကြာ ပြန်လာခြင်းဖြစ်သည်။

‘‘ဟိုမှာဆိုရင် လုပ်ရတာ အဆင်မပြေတဲ့အတွက် ဒီကိုပြန်လာတဲ့ အချိန်လေးမှာပဲ သီချင်းကို အဓိကလုပ်ဖြစ်တယ်။ လောလောဆယ် သီချင်းက မရေးရသေးဘူး။ စဉ်းစားနေတုန်းပါ’’ဟု ၎င်းက ပြောသည်။

အယ်လ်ဘမ် တစ်ချပ်စာ သီချင်းအပြည့် မထွက်မီ သီချင်း သုံးပုဒ်လုပ်ရန် စဉ်းစားထားပြီး လက်ရှိတွင် ဝဲနှင့် Mask နှစ်ပုဒ် သာ ထွက်ရှိထားသည်။

‘‘သုံးပုဒ်လုံးရဲ့ သီချင်းနာ မည်ကို စကားလုံး တစ်လုံးတည်း ပဲပေးဖို့ အစကတည်းက စဉ်းစားထားတာပါ။ သုံးပုဒ်စလုံးကို ပုံစံ မထပ်အောင် လုပ်သွားဖို့လည်း ရှိပါတယ်’’ဟု ဆိုသည်။

Mary သည် ရန်ကုန်တွင် ငါးတန်းအောင်ပြီးနောက် ဂျပန် နိုင်ငံသို့ ထွက်သွားကာ အလယ်တန်း၊ အထက်တန်းနှင့် ယခုလက်ရှိ ဂျပန်နိုင်ငံ Aoyama Gakuin တက္ကသိုလ်၌ နောက်ဆုံးနှစ်ကို Economy and Policy အဓိကဖြင့် တက်ရောက်နေသည်။

‘ဝဲ’သီချင်းကို အွန်လိုင်းတင်ခဲ့ပြီးနောက် အများစုက လက်ခံ အားပေးခဲ့သော်လည်း ၎င်း၏ ထူးခြားသည့် အသံနှင့် ပတ်သက်၍ ဝေဖန်မှုအချို့ရှိလာရာ လူမှုကွန်ရက်တွင် ခေတ္တခဏပျောက်ကွယ်သွားခဲ့သော မေရီသည် မကြာမီက ‘Mask’ သီချင်းဖြင့် ပရိသတ်ထံ ပြန်လည် ရောက်ရှိခဲ့သည်။

ဂျပန်၌ ပို၍အနေများပြီး ရန်ကုန်သို့ ကျောင်းပိတ် ရက်များသာ ပြန်ရောက်ဖြစ်သည်ဟု ၎င်းက ဆိုသည်။

‘‘ပထမဆုံးလုပ်ဖြစ်ခဲ့တဲ့ သီချင်းက Lil'z နဲ့ ‘မငိုပါနဲ့တော့’ ပါ။ အဲဒီသီချင်းကို မြန်မာနိုင်ငံမှာ Officially စလုပ်ဖြစ်တယ်။ ဒါပေမဲ့ အဲဒီတုန်းက Mary ဆိုတဲ့ နာမည်ပဲထည့်ထားတယ်။ ဘယ်သူလဲ၊ ဘယ်ကလဲဆိုတာ အသိ မပေးခဲ့ဘူး။ အဲဒီလိုလေးနေချင်လို့ ဒီအတိုင်းပဲ လုပ်ပေးပါဆိုပြီး ပြောခဲ့တယ်’’ဟု မေရီက ပြောသည်။

အဆိုပါသီချင်း၏ အရှေ့တွင် Cover Song အတော် များများဆိုခဲ့သလို ‘မငိုပါနဲ့တော့’ သီချင်းကို အဆိုတော် Lil'z ၏ ကမ်းလှမ်းမှုကြောင့် တိုကျို၌ အသံသွင်းကာ အွန်လိုင်းမှ ပေးပို့ခဲ့ခြင်း ဖြစ်သည်။

Mary သည် ဩဂုတ် ၄ ရက်က ရန်ကုန်သို့ ရောက်ရှိခဲ့ပြီး စက်တင်ဘာ ပထမပတ်၌ ဂျပန် နိုင်ငံသို့ပြန်ရန် စီစဉ်ထားသည် ဟုဆိုသည်။

ခင်ဆွေသက်
http://www.7daydaily.com

Your rating: None Average: 5 (1 vote)