Photo

မြန်မာပြည် တစ်ရက်တာ ခရီးစဉ်မှာ ပွဲဆူခဲ့တဲ့ မြန်မာပြည်ဖွား ဂျပန်အဆိုတော် မိုရီဆာကီဝင်း

By 7Day News 10 August, 2017 - 20:51

မြန်မာပြည်ဖွား ဂျပန် အဆိုတော် မိုရီဆာကီဝင်း၏ တစ်ရက်တာ ခရီးစဉ်အတွင်း မြန်မာပရိသတ်များ၏ အားပေးမှု ရရှိခဲ့ကာ ၎င်းနှင့်ပတ်သက်၍ လူမှုကွန်ရက်တွင် ဝေဖန်အငြင်းပွားမှု အချို့ ရှိခဲ့သည်။


မိုရီဆာကီဝင်း ရိုက်ကူး သရုပ်ဆောင်ခဲ့သော အမျိုးသား တစ်ဦးနှင့် တွဲဖက်ရိုက်ကူးထားသည့် ဇာတ်ဝင်ခန်းပါ ဓာတ်ပုံ အချို့ကို လူမှုကွန်ရက်တွင် မျှဝေကာ ဝေဖန်ပြောကြားခဲ့သည့် အပေါ် ဩဂုတ် ၈ ရက်ညက ၎င်း၏ Win Morisaki-Myanmar ဖေ့စ် ဘွတ်ခ်ပေ့ခ်ျက ပြန်လည်ရှင်းပြခဲ့သည်။

မိုရီဆာကီဝင်းသည် MNTV ရုပ်သံလိုင်းနှင့် JIB တို့ ပူးပေါင်း ရိုက်ကူးမည့် မြန်မာ၊ ဂျပန်ချစ် ကြည်ရေး ‘ဇာတိမြေ’ ဇာတ်ကား မိတ်ဆက်ပွဲသို့လည်း တက်ရောက်ခဲ့သည်။

‘‘ဒီကားမှာ ပါဝင်မယ့်ဇာတ်ရုပ်က အပြင်က မိုရီဆာကီဝင်းဆိုတဲ့ ကာရိုက်တာနဲ့ နီးစပ်မှုရှိတယ်။ ကိုယ့်မြန်မာနိုင်ငံက လူတွေနဲ့ တွဲရိုက်ရမယ်ဆိုတဲ့အတွက် အရမ်း ဝမ်းသာတယ်။ ကျွန်တော့်ကို ဒီလိုအခွင့်အရေး ပေးတဲ့အတွက် အရမ်းကျေးဇူးတင်ပါတယ်’’ဟု ၎င်းက ပြောသည်။

ဂျပန်ပြည်၌ prizmaX အဖွဲ့ နှင့်အတူ အနုပညာလှုပ်ရှားမှုများ လုပ်ကိုင်ရင်း မြန်မာဂျပန်ပွဲတော်တွင် လာရောက်ဖျော်ဖြေရာမှ မြန်မာတစ်ဦးဟု လူသိများခဲ့ခြင်းကြောင့် ဇာတ်ကားရိုက်ကူးရန် အကြောင်း ဖန်လာခြင်းဖြစ်သည်။

၎င်းသည် အဘွားနှင့်အတူ (၁၀)နှစ်အရွယ်အထိ ရန်ကုန်မြို့၌ နေထိုင်ခဲ့ပြီး နောက်ပိုင်းတွင် ဂျပန်နိုင်ငံသို့ ထွက်ခွာခြင်းဖြစ်သည်။

‘‘ဂျပန်လူမျိုး အဖြစ်လည်း မခံယူပါဘူး။ မြန်မာပတ်စ်ပို့နဲ့ပဲ နေပါတယ်။ အနုပညာအလုပ်ကို (၁၄)နှစ်သားတုန်းက စလုပ်ခဲ့ပါတယ်။ အခုလက်ရှိက ဂျပန်နိုင်ငံမှာ prizmaX အဖွဲ့နှင့်အတူတူ အနုပညာ လှုပ်ရှားမှုတွေ လုပ်နေပါတယ်။ သူတို့နဲ့လုပ်တာ လေးနှစ်နီးပါး ရှိပါပြီ။ ဩဂုတ် ၃၀ ရက် ထွက်မယ့် အခွေနဲ့ဆို ရှစ်ချပ်ရှိပြီ’’ဟု မိုရီဆာကီဝင်းက ပြောသည်။ အနုပညာအလုပ်ကို ဂျပန်၌ အဓိကထား လုပ်ကိုင်ပြီး သီချင်းဆိုခြင်းအပြင် သရုပ်ဆောင်ပါ တွဲဖက်လုပ်ကိုင်ခြင်း ဖြစ်သည်။

‘‘ဒီကားမတိုင်ခင် ဂျပန်မှာ သရုပ်ဆောင်ခဲ့တဲ့ ဇာတ်ကား လေးကား လောက်တော့ရှိတယ်။ ကျောင်းသား ကာရိုက်တာတွေ များတယ်။ ခေါင်းဆောင်အနေနဲ့ ရိုက်ခဲ့တာ တစ်ကားပဲရှိတယ်။ လူငယ်ဘဝကားပါပဲ’’ဟု ၎င်းက ပြောကြားသည်။

ခင်ဆွေသက်
http://www.7daydaily.com

Your rating: None Average: 5 (1 vote)